طريقة نصب ظريفة
من أكتر المرات اللى إتنصب عليا فيها وعجبتنى الطريقة! الحقيقة كانت ظريفة وجديدة عليا بصراحة.. 😂🤦♂️
من فترة، كنت شغال فى شركة، ودخل علينا راجل "گُباره" كده وكبير فى السن، ومظهره يوحي بالوقار الشديد.. دخل الريسيبشن وطلب يقابل مدير المبيعات علشان تقييم وتجهيز عيادة وشقة فى مدينة نصر، وشقة تانية فى مدينة الرحاب. 🏢✨
الراجل قال بثقة: "أنا الدكتور الفلانى.. ومراتى المهندسة العلانى" 🤵♂️👰♀️
وقال إنه معاه "سي دي" عليه مخططات الأماكن دى (طبعاً وقتها مكنش فيه موبايلات حديثة ولا واتساب ولا الكلام ده). 💾
طب اتفضل يا سيدي.. السي دي فين؟
قالك: السي دي فى شقة مدينة نصر، وهي هنا جنبنا.. إيه رأيكم نروح نشوف الشقة على الطبيعة ونجيب السي دي بالمرة؟ 🤷♂️
كان كل تركيزه إنه يجر رجلنا لموضوع الأسطوانة ده.. قمنا نتحرك، فلقيته بيقترح:
"طب ما تاخد اللاب توب بتاعك معاك بالمرة عشان ننجز؟" 💻
كنا وقتها فى مكتب المحاسب واللاب توب بتاعه قدامنا.. ق
ولتله طب هروح اجيبه من مكتبي؟ المحاسب كتر خيره قال لي: "خد اللاب ده لسه هتروح وتيجي؟" .. قولت ماشي، وياريتني ما قولت! 🤦♂️
أنا كنت واخد معايا شنطتي.. والله كانت مستوردة ومكملتش معايا يومين! لدرجة إني ملحقتش أحفظ ملامحها ولا أفرح بيها.. 🎒🥲
نزلنا، ولقيناه راكب عربية مرسيدس (موديل قديم شوية بس مرسيدس برضه.. يعني ركوبة البشوات) 😉ـ🚗
ركب الراجل ولقيته بكل كرم بيفتح الباب اللى ورا ويقولي: "حُط حاجتك هنا ياهندسة ورا عشان تقعد براحتك قدام".. وماله يا عم الحاج! ما هي معانا فى نفس العربية ومفيش قلق. 😉
اتحركنا.. وكان معاه عصير ومصممممم إني أشرب منه.. والحمد لله، بعد إلحاح رهيب منه مشربتش! ربنا ستر ولحد دلوقتي بقول يا عالم العصير ده كان فيه إيه! 🍉🥤❌
المهم.. دخلنا يمين فى شمال، المنطقة أنا عارفها وحافظها لأني فيها من زمان.. الراجل بقى ماشي بيوزع سلامات:
يعدي على كام غفير: "إزيك يا أبومحمد؟" .. الغفير يرد: "اتفضل يا هندسة تعالى أشرب شاى!" ☕
واحد قاعد على دكة: "إزيك يا أبو أحمد؟" .. يرد: "أيوة يا باشمهندس اتفضل!" 🤝
الراجل محسسني إنه عمدة المنطقة وكل الناس عارفاه! لحد ما وصلنا قدام عمارة، ورجع بضهر العربية فى نازلة جراچ.. وقال لي:
"انزل أنت بقى ياهندسة عشان الجراچ ضيق تحت وأنا هظبط النزلة" 📉
نزلت.. وغفير العمارة دي كان قاعد الناحية التانية، لما شافنا قام وقرب علينا.. وأنا مش في دماغي حاجة خالص.. الراجل طلع بالعربية عشان "يعدل نفسه" ويظبط النزلة..
طلع.. ودخل فى شمال صغير كده بين العماير.. وووو.. مرجعش! 😳
الـثـانـيـة عـدت.. الـدقـيـقـة عـدت.. ومفيش حد رجع! 🤷♂️
ببص للغفير وقولتله: "أحيه.. هو الباشمهندس مش هيركن هنا ولا إيه؟" 🤔
الغفير بكل برود: "باشمهندس مين يا هندسة؟!" 👁️👄👁️
قولتله: "الراجل اللى لسه قايلك إزيك يا أبومحمد.. وأنت قولتله أزيك يا باشمهندس اتفضل!" 😮
قال لي: "يا باشا واحد ماشي في أمان الله وبيسلم عليا.. سلمت عليه وخلاص! أنا معرفوش!" 💀😂 أنا جاى أشوف أنتوا بتعملوا ايه.
طبعاً الصدمة أخدت ثواني عقبال ما استوعبت الملعوب.. جريت ورا العربية بس كان فص ملح وداب.. ابن اللذينة اختفى! 🏃♂️💨
اتصلت باتنين صحابي، واحد منهم جالي بالفيسبا بتاعته وقعدنا نلف نجرى يمين فى شمال.. بس خلاص، "طار "! 🛵💨
والله قعدت كام سنة بعدها.. أكون ماشي فى الشارع عيني مركزة تلقائياً مع لون وموديل العربية دي في كل إشارة مرور! 🚗👀
المهم.. هو أخد لاب توب المحاسب (ربنا يمسيه بالخير بقى ويعوض عليه وعلينا)، وأخد الشنطة اللى مفرحتش بيها.. بس طبعاً كل ما افتكر الموقف بقول: "الحمد لله.. الحمد لله إني مشربتش العصير".. كان زمان القصة اتقالت في مكان تاني خالص! 🤲😂
يا ريت كل واحد يخلي باله.. النصابين بقوا بيمثلوا بأوسكار! 🎬 الحذر يا جماعة!